በሲዳማ አካባቢ ስላለዉ የሃገራችን ወቅታዊ ሁኔታን በተመለከተ ከኤጀቶ የተሰጠ መግለጫ

breakingfreeበሀገራችን አንጻራዊ ሰላም እየሰፈነ ባለበት ባሁኑ ወቅት የሲዳማ ሕዝብ ከለሎች ኢትዮጵያዉያን ወገኖቹ ጋር ሆኖ በህግ የበላይነት የሚትመራና ሁሉም ተከባብሮና ተፈቃቅሮ የሚኖርበትን ሀገር ለመመስረት ያለዉን ሕልም እዉን ለማድረግ በጉጉት እየተጠባበቀ ባለበት ጊዜ የሲዳማ መሬት በሃገራችን የመጣዉን ለዉጥና የሲዳማን ሕዝብ የነጻነት ጉዞ በሚቃወሙ ኃይላት እየተቀነባበሬ በየጊዜዉ ለሚላኩ ሰላምን ለሚያደፈርሱ ዉዥምብሮችና ግጭቶች  ማስተናገጃ ስፍራ መሆኑ ግን አልቀረም። የሲዳማ ሕዝብ  ባለፉት 9 (ዘጠኝ) ወራት ዉስጥ ብቻ በዚሁ ሴራ ከ30 በላይ ተወላጆቹን ያጣ ሲሆን በ100 በሚቆጠሩት ላይ ደግሞ ከባድና ቀላል የመቁሰል አደጋ ደርሶባቸዋል። ይህ ሁሉ ግፍ በሕዝባችን ላይ እየተፈጸመ ለዉጡ በሲዳማ ዉስጥም ተገብሮ የሲዳማ ሕዝብ ድምጽ የምሰማበት ወቅት ይመጣል ብሎ ሕዝባችን ብታገስም ማንነቱንና ሕልዉናን አደጋ ላይ የሚጥሉ ሁናተወች ግን መልካቸዉን እየቀየሩና እየተባባሱ እንጅ እየቀነሱ አልሄዱም።

ለአብነት ለመጥቀስ ያህል ባሳለፍነዉ ሣምንት ብቻ የኢትዮጵያ ሰብአዊ መብቶች ጉባኤ (ሰመጉ) ባወጣዉ ሪፖርቱ ላይ ከዚህ በፊት በጸረ ለዉጥ ሃይሎች በተቀነባበረዉ ግጭት ከሲዳማም ሆኔ ከወላይታ በኩል ብዙ ነፍስ መጥፋቱ የሚታወስ ቢሆንም ሪፖርቱ ግን ከሁለቱም በኩል የሞቱትን በአንድነት ደምሮ በሲዳማ ብሄር ተወላጆች በተፈጸመ ጥቃት የተገደሉ የወላይታ ተዎላጆች ብሎ በማያሻማ ሁኔታ መላዉን የሲዳማ ብሔር እንደወንጀለኛ መፈረጁና ግድያዉንም ከግጭቱ በፊት በሰላም ከተጠናቀቀዉ ከሲዳማ አመታዊ ፊቼ በዓል ጋር ለማገናኘት መሞከሩ የተቋሙ በሀገራችንና በአለም አቀፍ ደረጃ ካለዉ ተሰምነት ጋር አያይዞ በመመልከት የችግሩን አሳሳብነት ለመገመት አዳጋች አይሆንም።

በሌላም በኩል ደግሞ ዘመን ተሻጋር የሆነዉንና ብዙ መስዋዕት የተከፈለበትን የማንነትና የራስን እድል በራስ የመወሰን ጥያቄ ህገ መንግስትን ተከትሎ በየደረጃዉ ዉይይት ተደርጎ የደ/ብ/ብ/ህ/ክ/መ/ም/ቤት የህገ መንግሥቱን ህደት ተከትሎ እንድያልቁ ባስቀመጠዉ አቅጣጫ መሠረት አሁን ረፈረንደም ብቻ በቀረበት ወቅት አንዳንድ ሃይሎችና ግለሰቦች ይህንን የብዙ ሚልዮን ሕዝብ ድምጽ ለማፈን ስሯሯጡ ይታያሉ።

የሲዳማ ሕዝብ ለማንነቱ ከማንም ጋር ተደራድሮ አያዉቅም። የሲዳማ ሕዝብ አሁን ላለበት ደረጃም የደረሰዉ ማንነቱ እንድከበር  ከደርግ ጋር ተፋልሞ ብዙ መስዋዕት ከፍሎ ደርግ ከወደቀ በኋላ ይህንን መብት እዉን ለማድረግ አሁን በሥራ ላይ ያለዉን ሕገ መንግስት ለማርቀቅ ከሽግግሩ መንግሥት አካል የነበረዉ ለነጻነቱ በከፈለዉ መስዋዕት እንጅ በማንም በጎ ፈቃድ ወይም ከባዶ ተነስቶ አይደለም።አሁን ለመጣዉም ለዉጥ የበኩሉን ድርሻ ተጫዉቷል። የሲዳማ ሕዝብ ለሰላም ካለዉ ጽኑ ፍላጎት የተነሳም ጠቅላይ ሚ/ር አብይ አህመድን በያለማመንታት ሁለት እጁን ከፍቶ ‘ዳወኤ ቡሹ’ ብሎ ተቀብሎ አሁንም ለዉጡ የተሳካ እንድሆን ከኤጄቶ ጋር በመሆን በትጋት እየሠራ ይገኛል።

ስለሆነም አሁን ላለዉ ወቅታዊ ጉዳይ ኤጄቶ የሚከተሉትን ባለስድስት ነጥብ የአቋም መግለጫ አዉጥቷል፤

  1. የሲዳማን ሕዝብ ባሁኑ ሰዓት በሞግዝትነት የሚመራዉ ደሕደን(ደቡብ ሕዝቦች ደሞክራሲያዊ ንቅናቄ) ላለፉት 27 አመታት ሕዝባችንን እያፈናቀለና እያስገደለ የቆየና አሁንም የተለያዩ አጀንዳዎችን አቀነባብሮ በማምጣት ሰላም ፈላጊዉን ህዝብ እየተተናኮለ ያለ ነዉ። በቅርቡ በሃዋሳና በአከባቢዉ ለተፈጠሩ ለጸጥታ ችግሮችና ለጠፋዉም ህይወት ደኢህዴን ተጠያቅ እንደሆኔ ኤጄቶና የሲዳማ ሕዝብ ብቻ ሳይሆን መንግስትም ያምናል። ስለዝህ ባሁኑ ጊዜ የዝህን ወንጀል ተሳታፍወች በህግ ፍት ለማቆም እየተሰራ ባለዉ የምርመራ ሥራ ላይ እነዚሁ ተጠርጣር አካላት የተሳተፉበት በመሆኑ ዉጠቱ በሲዳማ ሕዝብ ዘንድ ተአማንነት ወይም ተቀባይነት ስለማይኖሬዉ ገለልተኛ አካል በአስቸኳይ ተቋቁሞ እንድጣራና ወንጀለኞቹ በቶሎ ለፍርድ እንድቀርቡ እንድደረግ በአጽንኦት እንጠይቃለን።
  2. የኢትዮጵያ ሰብአዊ መብቶች ጉባኤ (ሰመጉ) በኢትዮጵያ መንግስት እዉቅና የተቋቋመና በኢትዮጵያውያን ላይ የሰብአዊ መብት ጥሰትን ለመከላከል ጥብቅና ለመቆም ትልቅ ኃላፍነትን የተሸከመ ቢሆንም ለዚህ እዉነታ ቅንጣት ያህል ሳይጨነቅ የጥቅት ግለሰቦችና ቡድኖች መልዕክት ለማስተላለፍ ታስቦና ሆን ተብሎ የመላዉን የሲዳማን ሕዝብ ማንነት ላይ የሚያነጣጥረዉን የሰመጉ 146ኛ ልዩ መግለጫ ኤጄቶ በጽኑ ያወግዛል፤ በአስቸኳይ ማስተካከያ ተሰጥቶ እንደገና ታትሞ ለመገናኛ ብዙሃን ከተገለጸ በኋላ ጉባኤዉ የሲዳማን ሕዝብ ይቅርታ እንድጠይቅ አጥብቀን እናሳስባለን።
  3. የዶ/ር አብይ አህመድ ዘመን ‘የጥድፍያ’ ሳይሆ ለረጅም አመታት ብዙ መስዋዕት እየተከፈለ ሳይመለስ የቆየዉን የሲዳማ የክልል ጥያቄ በህገ መንግስቱ ላይ በተቀመጠዉ ሂደት መሠረት ሁሉን ደረጃ አልፎ የቀረዉን የረፈረንደም ጉዳይ ሕዝቡ በጉጉት እየተጠባበቀ ባለበት ባሁኑ ሰዓት የሲዳማን ጥያቈ ከድንበር ጉዳዮች ጋር ለማገናኘትና እንደ አድስ ጥያቄ በማስመሰል ለማጓተት ተብሎ በአንዳንድ ሕግን በማያዉቁ አካላት የተጀመረዉን ዘመቻ አጥብቀን እናወግዛለን። ይህ የሚልዮኖች ሕዝብ ድምጽ ህገ መንግስቱን ተከትሎ በእስቸኳይ ሕዝበ ዉሳነ ተደርጎ ተፈጻሚ እንድደረግ አጥብቀን እንጠይቃለን። የሲዳማ ዞን አስተዳድርም ይህንን ህደት ለመከታተልና ለማስፈጸም ሕጋዊ አካል ያለዉ በመሆኑ ህደቱን በኃላፍነት በመከታተል ለሕዝቡ በየጊዜዉ ጉዳዩ የደረሰበትን በማሳወቅ ድርሻዉን እንድወጣ ኤጄቶ ያሳስባል።
  4. የሲዳማ ሕዝብ የራሱን እድል በራስ ለመወሰን ከምን ጊዜዉም በላይ አንድ በሆነበት ወቅት በተለያዩ አካላት በጄት ተመድቦ ይህንን አንድነት ለመናድ ተልዕኮ ወስደዉ የምንቀሳቀሱ አካላት እንዳሉ ኤጆቶ ያዉቃል። በዚህ በጥፋት መንገድ የተሰማራችሁ ግለሰቦችና ቡድኖች ከሲዳማ ሕዝብ ላይ እጃችሁን በእስቸኳይ እንድትሰበስቡ ኤጄቶ ያስጠነቅቃል።
  5. የሲዳማ ሕዝብ የመብት ትግል ከዚህ በኋላ ወደኋላ እንደማይመለስ ጠላትም ወዳጅም ልገነዘብ ይገባል። ህጋዊ መብቶቹም የሚመለሰዉ ወይም የሚከለከለዉ በአሉባልታ ወሬ ወይም በሰዎች በጎነት ላይ ተመሰርቶ ሳይሆን በሕገ መንግስት ላይ በመመስረት መሆኑን በመገንዘብ በበሬ ወለደ ዉሸት በማህበራዊ ሚዲያ አዉታሮች፥ በተለያዩ መድረኮች፥ እንድሁም አንዳንድ ተለቭዥንና ረድዮ በመጠቀም ለተሰጣችሁ ተልእኮ በተከበረዉ የሲዳማ ሕዝብ ስም ላይ ጥላሸት ለመቀባትና እንድሁም ከሲዳማ ሕዝብ ጋር ተዋልዶና ተፈቃቅሮ አብረዉ በሚኖሩ ከለሎች ወንድም ሕዝቦች መሃል ጥላቻና ግጭት በመሥራት ዘመቻ ላይ የተጠመዳችሁ አካላት ባስቸኳይ እንድታቆሙ እናሳስባለን!
  6. ኤጄቶ ያለፈቃዱ በደቡብ ክልል የታጨቀን ጭቁኑን የሲዳማን ሕዝብ ነጻ ለማውጣት፣ የሕዝቡን ሕገመንግሥታዊ መብት ለማስከበርና ለማስጠበቅ፣ የአካባቢውን ሠላም ለመጠበቅ ተግቶ የሚሠራ አካል ነው። “ጥያቄያችን ሕገመንግሥታዊ፣ ትግላችን ሠላማዊ” በምል መሪ ቃል ትግሉን የጀመረው ኤጄቶ በሠላማዊ ትግል ፍጹም የሚያምንና የሲዳማ ሕዝብ ሕገ መንግስታዊ መብቱ ሙሉ በሙ እስከሚረጋገጥ ድረስ በሲዳማ ሕዝብ ጎን በመቆም ታርካዊ ግደታዉን ለመወጣት በጽናት እየታገለ ያለና ከዝህ ዓላማዉ ላንድ ደቂቃም ፍንክች የማይል ነዉ። ስለዝህ ለሌብነት ሩጫ ኤጀቶ እንቅፋት ስለሆነባችሁ ኤጀቶን በተለያየ መልኩ ዓላማ ባደረገ ዘመቻ ላይ የተሰማራችሁ አካላት ህልማችሁ የማይሳካና የቀን ቅዥት መሆኑን ተረድታችሁ እጃችሁን ከኤጄቶ ላይ እንድታነሱ አጥብቀን እናሳስባለን!

ድል ለጭቁን ሕዝብ!

ኤጀቶ

ጥር 3 ቀን 2011

ሐዋሳ