Ejjeettote Uurrinsha!

Techo Badheessa 17, 2011M.D Ejjeetto Wiinamu Songo Songite, Lamu Sirinyi Aana Aane Nooha Uurrinshate Xawishsha Fushshitino!

1.Layinki gaadi albaanni Deedeni Sidaamu xa’mo gufisate qixxeessino sanade kaiminni aanasi kaajjado qaafo adhinoonniti qaangannite. Konni korinni, Deedeni Sidaamu Zoonenna Hawaasi Quchumi Gashshooti giddo wolqa afi’rannokkiha assine keeshshinonni.

Xaa yannara Deedeni mereerima komite miilla ikkitinori Sidaamu xa’mo aana huluullo kalaqate untanni noo bale suunfe iillinoonni.

Konnira, Sidaamu xa’mo jeefo gansiisate Deedeni buqqisantenni roore, hee’re reyanno qaafo adha hasiissino.

Hee’re reyanno gede assate qara hayyo, miilla aganunni baaxxitanno fushsho ittisanna Deedenita aye songono songa agura hasiissannota hasaambe sumuu yinoommo.

Ikkinohurano, konni aganinni kayinse, Sidaamu Zoonenna Hawaasi Quchumi Deedeni Miilla Aganu Fushsho (መዋጮ) baattannokki gede kaajjinshe sokka sayinsanni qoleno, Deedeni su’minni aye songono songa hasiissannokkita duu’ne xawinseemmo. Ledeno, konni sirnyi gumulo albankeenni Hamusete barra heedhannonke xaphoomu songonni dhaambeemmota ikkitanno.

2. Deedenino ikko ali gashshooti Sidaamu xa’mo injiisaro duumba qolate, woy xiinxallotenni dawarate, hakkiinni sa’uro, keeshshiishate hasatto noonsata ordinsa leellishanno. Tenne mixonsa gafa gansiisate horonsidhanno hayyo giddonni mitte ninke ninkewa mimmito huluullammeemmo ajanda kalaqa ikkinota keennoommo.

Hattenne hexxonsa gafa gansiissate tafa tuqqino garinni anfeno ikko afa hoogatennk yannara meessi manni sada addi addi doogonni feesibuukete aana kayinsanni keeshshinooniti mittimmanke jifate deerra iillitinota masaalloonni.

Konni ka’a kayinni, giddoydi hajo lammeessine, Sidaamu Xa’mo aana calla illachisha hasiissino. Ikkollana, polotiku qiniite adhate amaalamme giddo baandooti aana mitteenni adhinara qaafo agurranna techo barrinni kayinse, meessi manna feesibuukete aana suntannikki gede duu’ne sokka sayinsanni, jaddote korkaatinni coyinsa higgete anga noo mannooti hajo meessa hi’ra e’nikkinni higgete garinni gumulo afidhanno gede xawinsanni, higgete aana hekko kalaqatenni daga hembeelsitanno mannooti eemadhitanno gede egensiinseemmo.

Tini Ilama Sidaamu Qoqqowo Xintate Sharrantanno Goofimarchu Ilamaati!!

Ejjeetto
Hawaasa,

Sidaama

Ethiopia