Ejjeettote Xawishsha!

Techo Onkoleessa 14, 2011M.D Ejjeettote Miilla Wiinamu Songo Songite Yannate Ikkito Aana Cinaancho Gaamonnni Hasaabbe Aananno Xawishsha Fushshitino.

Techo songonni, xaa yannara Sidaamu daganna ejjeetto illensa qaru sirnyi (Sidaamu Qoqqowi Hajo) wiinni kayissanno gede assinanni loosi hala’ladunni loosamanni noota keentino.

Umihunni, addi addiha xuxxulo sirnya woraddanna quchumma qolle ollollanni Ejjeetto qoqqowu hajo mulaagisse wolere guddanno gede assate looso mixi’ne loobsanni hee’noonnita keentino.

Konnirano, xaa geeshsha waaga baaxxinoonni hajo gafa gantanno gede assate mixonni ejjeettote miilla tidhinokki ajandinni deantannokki gede qaagissitino.

Coy gedera, Sooreessu Gudumaali songo duumba li’middi yiinohu gosoomu polotiki wirro muuxxisanni noota keente, ayno “Ani Sidaamu ejjeettooti!” yaannohu hiikkono gosoomu polotikinni umosi eemadhanno gedenna “Sidaamu Mittimma” calla faarsatenni geerchu qaale agadhanno gede ejjeetto duudhe sokka sayissanno.

Wolewidoonni, akkalu yaadigi amuraatinni addi addi deerrira nooti mitootu mangistete sooreeyye uminsa biilloonye agartanno ejjeetto kalaqidhanni noota buunxoonni.

Togoo ikkitonni halaali sharramaano wolqa daafursate, ejjeettote mereero gibbo kalaqate, ejjeetto giwantino yite coye luushshitannonna Sidaamu xa’mora waa dunate millissanno gashshaano alinni eeli geeshsha noota assinoonni keenonni buunxoonni.

Konnira, togoo gashshaano assootinsanni eemadhitanno gede ejjeetto kaajjishshe sokka sayissanno. Ikka hoogeenna, gooffe daggino yannara Sidaamu xa’mo gufisate addi addi hamaamukko qalanno ajanda dagate giddora wixanni hembeelsannoha gashshootu biso ejjeetto worte la’annokkita seekkite kultanno.

Hatti hakko heedheenna xaa yannara iibbabbe woraddate, zoonetenna quchummate gashshootira hasaawamannori “Ewelo shoomme; Ewelo hoolle!” yaanno duduwooti.

Manna shoomanna shaara Ejjeettote looso di”ikkino. Ejjeetto Sidaamu wolaphora sharrantanno ilamaati ikkinnina kaadirete barcimi agaraano di”ikkitino. “Ewelo shoomme woy ewelo hoolle!” yaanno duduwo FB ikko loosu basera tuqisatenni eemadha hasiissanno.

Togoo duduwo abbe fincannohu Ejjeettimmate wodho gobbaanni ikkinotannna Sidaamu xa’mo gufissanno gaamo ledo lase noosiha ikkinota wodana assa hasiissannote Ejjeettote egensiissanno.

Roorinni, Sidaamu xa’mo Riferendeme agadhinanni wiinni sa’e dagginota seekkine anfe, aantete sharrote raga hasaambe mudhinate dagatenna ejjeettote mittimma hiinxisate assinanni ollanni kutta baalanta seekkine agadha hasiissannota xawissanno.

Wole widoonni, Looqqe Gooffo 17Ki diri qaaggo ayyaanira Harbagoona, Shaafaamo, Bursa, Xexicha, Alatta Wondo, Daalle, Shabbadiibo, Haweela, Tuula lekkatenni tayisse Hawaasa Looqqe iillite wolaphote lubbantu roduuwa qaagate millissanno miilla baalantanna darga dargaho koysidhu roduuwa galattanni, lekkate ha’rinsho beeqqitino miilla dana soorrammohu karsamannonsatano layidhanno gede qaagiissitanno.

Baxxino garinni kayinni, Kuni 17kihu Looqqe Gooffo Qaaggo diri Lubbantu roduuwi saffinota Sidaamu wolapho jeefo iillishate annu annunku uminkera wirro woyyo e’neemmo diro ikka noosita ejjeetto Sidaamu daga baalantera sokka maganyidhanno.

Looqqe Goofo 17ki Diri Qaaggonni aante Onkoleessa 22 nna 23 hossannoti Ficheenkeeti. Konni ayyaanira diinu adawanke hunara qodhe ka’annoha ikkara dandaannota ejjeetto seekkite huwattanno. Kuni Ficheete ayyaani keerunni sa”anno gede baalunku qarqarira noo ejjeetto ayyaana beeqqanno mannira adawu hajo lainohunni huwanyo kalaqqanno gede sokka sayissanno.

Saeno, woraddanna quchummatenni ayyaana ayirrisara Hawaasa daanno manni ledo dagge, dagansanna quchuminsa adawa agadhitanno gara woradunna quchummate gashshooti ledo malantanno gede ejjeetto qaagiissitanno.

Sidaamq, aye gedeno ikkite Fichee qara sirnyanke balaxxe daggurono, baalunku Sidaami illachasi QOQQOWU hajo aana wora hasiissannotanna diinu abbe wixanno biilloontu, woxu, horonna wkl manaadurichinni deama hasiissannosikkita ejjeetto seekkite qaagiissitanno.

Tini Sidaamu Wolaphora Sharrantanno Goofimarchu Ilamaati!

Qeelleemmo!

Ejjeetto
Hawaasa, Sidaama| ETHIOPIA